Quis potest Deo placere
Nouissimo in tempore
Variatis insignibus
Veritatis ordinibus
5
Exceptis contemptoribus
Mundi praesentis istius?
Altus prosator, uetustus
Dierum et ingenitus
Erat absque origine
10
Primordii et crepidine,
Est et erit in saecula
Saeculorum infinita;
Cui est unigenitus
Christus et sanctus spiritus
15
Coaeternus in gloria
Deitatis perpetua.
Non tres deos depromimus,
Sed unum Deum dicimus
Salua fide in personis
20
Tribus gloriosissimis.
Bonos creauit Angelos
Ordines et Archangelos
Principatuum ac Sedium,
Potestatum, Virtutium,
25
Vti non esset bonitas
Otiosa ac maiestas
Trinitatis in omnibus
Largitatis muneribus,
Sed haberet, caelestia
30
In quibus priuilegia
Ostenderet magnopere
Possibili fatimine.
Caeli de regni apice
Stationis angelicae
35
Claritate prae fulgoris,
Venustate speciminis
Superbiendo ruerat
Lucifer, quem formauerat,
Apostataeque angeli
40
Eodem lapsu lugubri
Auctoris cenodoxiae,
Peruicacis inuidiae,
Ceteris remanentibus
In suis principatibus
45
Draco magnus taeterrimus,
Terribilis et antiquus,
Qui fuit serpens lubricus,
Sapientior omnibus
Bestiis et animantibus
50
Terrae ferocioribus,
Tertiam partem siderum
Traxit secum in barathrum
Locorum infernalium
Diuersorumque carcerum
55
Refugas ueri luminis
Parasito praecipites.
Excelsus mundi machinam
Praeuidens et harmoniam,
Caelum et terram fecerat,
60
Mare, aquas condiderat,
Herbarum quoque germina,
Virgultorum arbuscula,
Solem, lunam ac sidera,
Ignem ac necessaria,
65
Aues, pisces et pecora,
Bestias, animalia,
Hominem demum regere
Protoplaustum praesagmine.
Factis simul sideribus,
70
Aetheris luminaribus,
Conlaudauerunt angeli
Factura pro mirabili
Immensae molis Dominum,
Opificem caelestium,
75
Praeconio laudabili,
Debito et immobili
Concentuque egregio
Grates egerunt Domino
Amore et arbitrio,
80
Non naturae donario.
Grassatis primis duobus
Seductisque parentibus
Secundo ruit diabolus
Cum suis satellitibus,
85
Quorum horrore uultuum
Sonoque uolitantium
Consternarentur homines
Metu territi fragiles,
Non ualentes carnalibus
90
Haec intueri uisibus,
Qui nunc ligantur fascibus,
Ergastulorum nexibus.
Hic sublatus e medio
Deiectus est a Domino,
95
Cuius acris spatium
Constipatur satellitum
Globo inuisibilium
Turbido perduellium,
Ne malis exemplaribus
100
Imbuti ac sceleribus
Nullis unquam tegentibus
Saeptis ac parietibus
Fornicarentur homines
Palam omnium oculis.
105
Inuehunt nubes pontias
Ex fontibus brumalias
Tribus profundioribus
Oceani dodrantibus
Maris, caeli climatibus,
110
Caeruleis turbinibus
Profuturas segitibus,
Vincis et germinibus,
Agitatae flaminibus
Thesauris emergentibus,
115
Quique paludes marinas
Euacuant reciprocas.
Caduca ac tyrannica
Mundique momentanea
Regum praesentis gloria
120
Nutu Dei deposita;
Ecce, gigantes gemere
Sub aquis magno ulcere
Comprobantur, incendio
Aduri ac supplicio
125
Cocyti quae Charybdibus
Strangulati turgentibus,
Scyllis obtecti fluctibus
Eliduntur et scrupibus.
Ligatas aquas nubibus
130
Frequenter crebrat Dominus,
Vt ne erumpant protinus
Simul ruptis obicibus,
Quarum uberioribus
Venis uelut uberibus
135
Pedetentim natantibus
Telli per tractus istius
Gelidis ac feruentibus
Diuersis in temporibus
Vsquam influunt flumina
140
Nunquam deficientia.
Magni Dei uirtutibus
Appenditur dialibus
Globus terrae et circulus
Abysso magnae inditus
145
Suffultu Dei, iduma
Omnipotentis ualida,
Columnis uelut uectibus
Eundem sustentantibus,
Promontoriis et rupibus
150
Solidis fundaminibus
Velut quibusdam basibus
Firmatus immobilibus.
Nulli uidetur dubium
In imis esse infernum,
155
Vbi habentur tenebrae,
Vermes et dirae bestiae,
Vbi ignis sulphureus
Ardens flammis edacibus,
Vbi rugitus hominum,
160
Fletus et stridor dentium,
Vbi Gehennae gemitus
Terribilis et antiquus,
Vbi ardor flammaticus,
Sitis famisque horridus.
165
Orbem infra, ut legimus,
Incolas esse nouimus,
Quorum genu precario
Frequenter flectit Domino,
Quibusque impossibile
170
Librum scriptum reuoluere
Obsignatum signaculis
Septem de Christi monitis,
Quem idem resignauerat,
Postquam uictor exstiterat
175
Explens sui praesagmina
Aduentus prophetalia.
Plantatum a prooemio
Paradisum a Domino
Legimus in primordio
180
GenesiS nobilissimo,
Cuius ex fonte flumina
Quattuor sunt manantia,
Cuius etiam florido
Lignum uitae in medio,
185
Cuius non cadunt folia
Gentibus salutifera,
Cuius inenarrabiles
Deliciae ac fertiles.
Quis ad condictum Domini
190
Montem ascendit Sinai?
Quis audiuit tonitrua
Vltra modum sonantia,
Quis clangorem perstrepere
Inormitatis buccinae?
195
Quis quoque uidit fulgura
In gyro coruscantia,
Quis lampades et iacula
Saxaque collidentia
Praeter Israhelitici
200
Moysen iudicem populi?
Regis regum rectissimi
Prope est dies Domini,
Dies irae et uindictae,
Tenebrarum et nebulae
205
Diesque mirabilium
Tonitruorum fortium,
Dies quoque angustiae,
Maeroris ac tristitiae,
In quo cessabit mulierum
210
Amor ac desiderium
Hominumque contentio
Mundi huius et cupido.
Stantes erimus pauidi
Ante tribunal Domini
215
Reddemusque de omnibus
Rationem affectibus,
Videntes quoque posita
Ante obtutus crimina
Librosque conscientiae
220
Patefactos in facie;
In fletus amarissimos
Ac singultus erumpemus
Subtracta necessaria
Operandi materia.
225
Tuba primi archangeli
Strepente admirabili
Erumpent munitissima
Claustra ac poliandria,
Mundi praesentis frigora
230
Hominum lucescentia
Vndique conglobantibus
Ad compagines ossibus,
Animabus aethralibus
Eisdem obuiantibus
235
Rursumque redeuntibus
Debitis mansionibus.
Vagatur ex climactere
Orion caeli cardine
Derelicto Virgilio,
240
Astrorum splendidissimo,
Per metas Thetis ignoti
Orientalis circuli;
Girans certis ambagibus
Redit priscis reditibus,
245
Oriens post biennium
Vesperugo in uesperum;
Sumpta in problematibus
Tropicis intellectibus.
Xristo de caelis Domino
250
Descendente celsissimo
Praefulgebit clarissimum
Signum crucis et uexillum,
Tectisque luminaribus
Duobus principalibus
255
Cadent in terram sidera
Vt fructus de ficulnea,
Eritque mundi spatium
Vt fornacis incendium;
Tunc in montium specubus
260
Abscondent se exercitus.
Ymnorum cantionibus
Sedulo tinnientibus,
Tripudiis sanctis milibus
Angelorum uernantibus
265
Quattuorque plenissimis
Animalibus oculis
Cum uiginti felicibus
Quattuor senioribus,
Coronas admittentibus
270
Agni Dei sub pedibus,
Laudatur tribus uicibus
Trinitas aeternalibus.
Zelus ignis furibundos
Consumet aduersarios
275
Nolentes Christum credere
Deo a patre uenisse.
Nos uero euolabimus
Obuiam ei protinus
Et sic cum ipso erimus
280
In diuersis ordinibus
Dignitatum pro meritis
Praemiorum perpetuis
Permansuri in gloria
A saeculis in saecula.